संत सखाराम महाराज संस्थान,अमळनेर पायीवारी दिंडी सोहळा २०१७

एकच टाळी झाली चंद्रभागे वाळवंटी ।
माझा ज्ञानराज गोपळांशी लाह्या वाटी ॥१॥
नामदेव कीर्तन करी पुढें नाचे पांडुरंग ।
जनी म्हणे बोला ज्ञानदेवा अभंग ॥२॥
अभंग बोलतां रंग कीर्तनीं भरला ।
प्रेमाचेनि छंदे विठ्ठल नाचूं लागला ॥३॥
नाचतां नाचतां देवाचा गळला पितांबर ।
सावध होई देवा ऎसा बोले कबीर ॥४॥
साधु या संतांनीं देवाला धरिला मनगटीं ।
काय झालें म्हणुनी दचकले जगजेठी ॥५॥
ऎसा कीर्तन महिमा सर्वांमाजीं वरिष्ठ ।
जड मूढ भाविका सोपी केली पायवाट ॥६॥
नामयाची जनी लोळे संतांच्या पायीं ।
कीर्तन प्रेमरस अखंड देई गे विठोई ॥७॥